“Jantzi zaitez kolorez”. Hori da Barañain Auditorioak aukeratu duen eslogana denboraldi berrirako. “Izan ere, ez da giro bazterretan. Ematen du den-dena histen ari dela, baina beti  izanen dugu hor kultura bazter guztiak koloreztatzeko”. Hori da gune honen arduradunen azalpena, eta horixe erakutsi nahi dute prestatu duten egitarau askotariko honen bidez, BEZaren igoerak gehiegi garestitu ez duen programazioaren bidez, alegia.”Ahalegin handiak ari gara egiten, taldeekin batean, edonork ordain ditzakeen prezioak jartzeko, arte eszenikoa guztiok goza dezagun”. Argibide eta asmo horiek dira udazkeneko ekitaldien abiaburua Barañainen. Denboraldi berria irailaren 30ean hasiko da, El bardo talde nafarrak “Bodas de sangre” antzezlana eskainiko baitigu egun horretan. Urriaren 6an, berriz, Barañaingo Harizti dantza taldearen emankizuna izanen dugu, talde horren 25. urteurrena ospatzeko, eta urriaren 14an, Bubulú taldeak “Divorciadas, evangélicas y vegetarianas” komedia antzeztuko du.  Urriaren 27an, Iluna Producciones taldearen txanda izanen da, ikusleei irribarrea eragiten saiatuko dira “Cerdo agridulce” lanaren bitartez. Gaurkotasun handiko bi lan hauek egungo gizartearen kezkak islatzen dituzte, gure ekintzen ondorioak eta gure eginbeharrak, umore ukitu batekin. Barañain Abesbatzak, bestalde, aurten ere emanaldia eginen du azaroaren 23an, Santa Zezilia egunean. Aurten, gainera, Irungo Nayade Abesbatza izanen dugu gure artean azaroaren 9an, Barañain Abesbatzarekin hitzarmena egin baitu ahots zuriak biltzen dituen Irungo talde horrek. Azaroaren 16an, “No me moleste mosquito” antzezlana izanen dugu ikusgai, Ambigú Producciones taldearen eskutik, eta abenduaren 16an, Nafarroako antzerki talde amateurren federazioaren antzerki denboraldia bukatzeko, Kumen talde asturiarra etorriko zaigu. Urtarrilaren 19an, Alkora taldearen tribu-dantzak eta La Ortiga taldearen “El idiota” izanen dira bertako artista eta taldeen ataleko azkenak.

Baina gure egitarauak umoreari ere eginen dio tartea. Izan ere, telebistan maiz ageri diren artista ospetsuen bakarrizketak izanen ditugu entzungai eta ikusgai: Vaquero (urriaren 26an), Gorka Aginagalde eta Iñigo Salinero (abenduaren 14an) eta Quequé (abenduaren 21ean).

Musikak ere auditorio honetan betidanik izan duen garrantzia izanen du denboraldi berrian. Urriaren 20an, Camut Band taldeak bisita eginen digu beste behin ere, 2006an eta 2007an egin zuen bezala, perkusioz eta klakez josiriko ikuskizuna eskaintzeko. Azaroaren 17an, berriz, José Menesek flamenkoz zipriztinduko du Barañaingo herria, eta azaroaren 24an, Patricia Kraus, 1987ko Eurovision jaialdian Espainia ordezkatu zuen kantaria izanen dugu gure artean, Alfredo Krausen  alaba. Javier Krahe nekaezinaren kanta satirikoak gustuko ditugunok gozatu ederra hartuko dugu abenduaren 15ean, eta Luar na Lubre taldeak, Mike Oldfieldekin kantatu zuten talde galiziarrak, amaiera bikaina  emanen dio ekitaldi sorta honi urtarrilaren 26an.

Dena dela, Barañain Auditorioaren denboraldi berrian haurrentzako ekitaldiak nabarmentzeko modukoak dira. Izan ere, Eguberrietan gure txikiak izanen dira nagusi. Abenduaren 22an, Nueva Babel taldeak musikal bat eskainiko digu, “Antídoto deseado”, maizegi hartzen gaituen tristuraren kontrako antidotoa izan nahi duena. Abenduaren 23an, Olentzero izanen da auditorioan, eta hilaren 26an, San Eztebe egunean, Barañaingo herriaren zaindariaren egunean, alegia, Iluna Produccionesek “Cuento de detectives” lana antzeztuko du. Abenduaren 29an, OCN taldeak beste ipuin bat ekarriko digu, Eguberrietakoa opera gisa, genero hori umeei hurbiltzeko ahaleginetan. Urtarrilaren 4an, “Pinocho” izanen dugu ikusgai, Tempus Producciones-en lana, 2011ko Max sarien finalera iritsi zena. Aipatu beharra dago, azkenik, azaroaren 25ean, haur magialarien VII. Nazio topaketen amaierako festa eginen dela.

Ikuskizun guztietarako sarrera txartelak salgai daude jadanik txarteldegian, 012 telefonoan eta entradas.com webgunean.

Egitaraua

Irailean:

Irailaren 30ean, “Bodas de sangre”, El bardo taldea, 10€

Urrian:

Urriaren 6an, Harizti dantza taldearen 25. Urteurrena ospatzeko emanaldia, 6€

Urriaren 14an, “Divorciadas, evangélicas y vegetarianas”, Bubulú taldea, 10€

Urriaren 20an, “Camut Aniversario”, Camut Band, 17€ (12€ 12 urtetik beherakoek)

Urriaren 26an, Vaquero eta Diego Peña, 18€ (16€ aldez aurretik erosiz gero)

Urriaren 27an, “Cerdo agridulce”, Iluna Producciones, 10€

Azaroan:

Azaroaren 9an, Nayade Abesbatza, 5€

Azaroaren 16an, “No me moleste mosquito” Ambigú Producciones, 12€

Azaroaren 17an, José Menese, flamenkoa, 20€

Azaroaren 23an, Barañain Abesbatza, 5€

Azaroaren 24an, Patricia Kraus, 17€

Azaroaren 25ean, Magialarien gala, 8€ (5€ haurrek)

Abenduan:

Abenduaren 14an, “Cotillas”, 12€

Abenduaren 15ean, Javier Krahe, 16€

Abenduaren 16an, antzerki amateurra, 8€

Abenduaren 21ean, Quequé, 15€

Abenduaren 22an, “Antídoto deseado”, Nueva Babel taldea, 12€ (8€ 12 urtetik beherakoek)

Abenduaren 26an, “Un cuento de detectives”, Iluna Producciones, 5€

Abenduaren 26an, “Eguberrietako ipuina”, OCN, 16€

Urtarrilean:

Urtarrilaren 4an, “Pinocho”, Tempus Producciones, 12€ (10€ 12 urtetik beherakoek)

Urtarrilaren 19an, Alkora, 15€

Urtarrilaren 25ean, “El idiota”, La Ortiga taldea, 10€

Urtarrilaren 26an, Luar na Lubre, 15€